الشعر أعزه وأحشمه لا لفاني
ما أعتبره إلا واحد من خواني
أهتم به وأروف له وأعتنز به
وأحمى جنابه من شرور الزماني
من بيننا ولف وعلاقة قديمه
اسهر علشانه ويسهر عشاني
ولاجيت له ناصي قضالي لزومي
يقضيه لو انه بزرق السناني
ولو ما انجز الموضوع راضي وقانع
من جهده اللي واضحٍ للعياني
وأنا أشيل الكون كله وأحطه
لاصادفه وقتٍ عصيب ونصاني
اكتب وأصون البيت لامن كتبت
وأطرزه للمخ قبل الأذاني
آخذ بفكر القاري بعالي الجو
وأطهره من غثربات الطماني
لأنه يعكس آرائي بوجه غيري
واياة أحد يقرى قصيدي قراني
من شرد بيوت القصيد النوادر
انقاله الجزل الفراد السماني
اسحر بها سامع وشاعر وناقد
ماهو بشرك الا بسحر البياني
وأنفذ بجلدي عن دروب الزرايا
عن الكلام الهزل اصون اللساني
ما أكتب قصيدي لأجل هذي وهذي
والا ارتجي مدة فلان الفلاني
هذا أنا والشعر حاله بحاله
أما غشيته يوم والا غشاني
وأنا استعيذ بمنتهاي بالهي
اللي على درب الهداية هداني
أعوذ بك يا رب من شر نفسي
ويالله من عوج الدروب تحماني