ابا اتوجد وجد من ضاع له شف
مع لابة ساقوا ضعنهم وقفى
يخيلهم لين ان مظهورهم هف
بالمرتفع ودموع عينه تكفى
حالت ضعاينهم ورى بارق رف
أحيا الوطن وأيبس كبود الأعفى
وأخذ ثلاث سنين والدمع ما جف
ينضح نضيح عيون بير ترفى
من بعدهم مثل الأسير المكتف
لين انتهت فترة حسابه وصفى
وركب على عوصا تكف النظاء كف
فجا عضود وسبتها ما تحفى
عملية ما مثلها مومية خف
طويلة المقدم عريضة مقفى
ويوم ان خامس خمس الأيام طرف
أرهى بممساهم وطيب الملفى
وقدام ينشد ناطحوه المزهف
وقالوا: ترى مضنون عينك توفى
أو وجد من عدى بطف على طف
طور ورى طور بعاليه شفی
والجيش عقبه شاف له شوف واختف
قوم زعاعة فوق جيش معفى
راحوا وهو يصفق بكف على كف
و من الضما بين العدام ايتهفى
اللوم والسوداء لهم فرش ولحف
فرش تفرشهم ولحف تضفى
عليك ياللي فيك عبلة توصف
نيران حبك بالحشى ما تطفى
ياللي كلامك در عرب تعاطف
بالمربعانية وكنه مدفى
تليتني تلة مهار تعسف
وبيحت سدي لين بان المخفى
أنا دخيلك عف عني وأنا أعف
ترى العذاب اللي حصل منك كفى