يالله ياللي بين كفك وأصابعك
مفتاح - تحريف الهبايب والأفلاك
ياللي بملك الكون محدٍ ينازعك
الملك ملكك وأنت ملاك الأملاك
وعن ماتشاء - ماتقدر الخلق تمنعك
ويوم اللقاء - نرجي تجاوزك وإعفاك
وحيرتني يالقاف وشلون ابا أبدعك
ياصعب تركيبك وتوضيح معناك
أحيان ماقدر - فيك وأحيان أطوعك
عقب العصايه لين ينقاد - ممشاك
وأخلّي اللي يفهم الشعر - يسمعك
وإن ما أنشعى - هذا يبي - ينشعي ذاك
ولا كل رجالٍ برايه يجي معك
ولا كل رآيٍ تقتدي فيه قداك
وتراه مايجزع لك إلاّ من أجزعك
قال المثل من لا يزعّلك مارضاك
واللي معك في كل شيٍ يشجعك
تراه مبدولٍ على الدبك دباك
وين أنت ياللي عايزاتٍ طبايعك
في كل جانب كاملاتٍ مزاياك
وش إسمك الكامل ووش - إسم موقعك
الناس يطرونك وأنا أزريت -لا ألقاك
من قال لك مابك عذاريب - خادعك
أما غبي وألا منافق ونماك
ماكامل إلاّ اللي من الرمل يجمعك
الواحد اللي له مميتك ومحياك
والظن في بعض - الاوادم يضيعك
لو أنت رجالٍ معك عرف وإدراك
لكن ترى الشّده على - السّر تطلعك
ويبين لك بالناس ماكان يخفاك
وتبيّن اللي ساعة الضيق ينفعك
وتبيّن اللي ساعة العسر يكفاك
إليا سبرك وشاف بقعا تصارعك
لو هو قصيرك من هكا اليوم ينساك
وإن حل ذكرك في المجالس يقطّعك
بالهرج حطّك بين أشافيه مسواك
الطيّب الطيّب إليا طحت يرفعك
شيكٍ بمخباتك وسيفٍ بيمناك
قلبه علي قلبك وعينه تطالعك
لو البحر دونك إليا أوميت له جاك
والوقت لابدّه من القيض يشبعك
و اللي وطى غيرك من الناس ياطاك
لو إن به شيٍ علي الكبد يوجعك
الصبر واجب والفرج عند مولاك
يا نجد وش ضيّقك والله موسعك
اللي من اوّل تمرح الناس بأرجاك
حنّا نعاين والمشفّح توزعك
تقطّعوا حتى جبالك وصحراك
جونا وراحوا في سكنك ومزارعك
والمشكله كان الطمع صار في ماك
ضاعوا بك اللي يوم ترجف مدافعك
ضد الشريف حسين وجنود الاتراك
من فعلهم كل الدول ماتزعزك
ماهم بحجّاجٍ يروحون مناك
واليوم جوك وضيّقوا في شوارعك
سكّان جاوه والحضارم وما أدراك
ماجولك إلا يوم كثرة طمايعك
يوم إن أخو نوره من الشوك صفاك