ادريك عالي ويا جبل ما هزه ريح
سبحان من أرسى الأرض بجبالها
يعراق اسمك بالفخر كلش جبير
يلّي ما لمّك شِعِر كوّالها
الروج عالي ومركبك مرساهْ ثجيل
صرت ناعور ابخشم شلّالها
خيمتك عفّة وتسامرها النجوم
وكصّتكْ غرّه ويلالي اهلالها
منو ياعايل يمر يمهه ويحوف
الهوة مانسّم جريب احبالها
يبو سيف الماصدة بغمده ومهيب
لوتسلّة اتهاب منّة أبطالها
يبو حجي الزين يا جلمة رزان
جنها مهرة تزامط بخيالها
صبرك إبراهيم نصبو منجنيق
اولا خفت نمرود مو جفّالها
أنت نطاح الفشك صخرة وعنود
يا صدر ماهاب من هيّالها
بغداد من تمشي بغنج زفة عروس
ضحكة السمرة التباهي ابخالها
حياج يا بنت العرب مشيج ثجيل
زيّنت خطو المشي بخلخالها
آه يا غربة وطن همّج جبير
لو تعن الروح منهو ابحالها
حيل توجعني وأنا الجرحي عتيج
بخيط اركّعها ويتيخ اذيالها
غربة مرّه ولا طعم بيها الحياة
خاف نكضي وما يصح نكّالها
من يصح ادري ترة حنّت غريب
خاف يبخل بالجفن نزّالها