ماتردى يابنت ياللى بتفطمى عيالك
هاتى كتاب التراث
واسقى مولودك
وحفظيه التارخ
يمكن اذا مايشب
يعرف سكته ودارك
ويقيد ف أنوارك
ويرجع الشمس لمدارك
ماتدفينش كتب التراث ف الكفن
واحنا ف قفا اليوم اللى عدى وفات
وخلا احيائنا موات
وأشعل النار ف أشجارنا
وداس ع النبات
وسقّط الحبلى ف شهرها التاسع
ماتردى يابنت ياللى بتفطمى عيالك
ماتعلميش الولاد على انها تطاطى
وتحت ف الواطى
خلى الولاد تدوق المر من بزك
وتكره الذل
وتقرب ف يوم عزك
عزك ف ايدك
اذا قدرتى تشيلىالنور بكفينك
وتغرزيه ف العتمه بالغصبان
وتشب اولادك
نضيفة الجوف
بيض الأيادى، وقلبها بستان
اما احنا من جيل الزمن
اللى هان على صحابه
ماشين ف سكة اللى يروح
مايرجعشى
والنور على ايدينا
زعل وماطلعشى
حالف يعلقنا على خوفنا
لحد ماترضعى ابنك
وتحفظيه التاريخ
وتفطميه على كتاب التراث ف اللبن .