تضحك ومن هجرك فؤادي مكدر
وتداري أحزاني بضحكه كذوبه
وجدي تفجر في ضميري ودمر
احصون صبري وما ليه عنك توبه
حاولت نسيانك ولكن تعذر
علي نسيانك بنفس امغلوبه
ما انته الوحيد اللي بحسنك امصور
مثل البدر حسن ودلال وعذوبه
لكن قلبي بك لوحدك تاثر
وروحي على حبك أراها امغصوبه
أورد عليك وبالظما عنك اصدر
ظامي وما عندك لودك مثوبه
تلعب باحساسي ياليت اتذكر
إني بشر وإحساس ما يلعبوا به
صدقت فيه عاذل ساعي ابشر
ما حس قلبك ان خلك سعوا به
وصديت عني عامد واتعذر
ما اتخاف يا ظالم تصيبك عقوبه
واللي دهاني منك ما حد يقدر
على علاجه منه روحي امعطوبه
بي شي بالأنفاس يحيا ويكبر
ويموت بالأنفاس يا ذي عجوبه