الشرعية شرعية الداو ليا
شعارها تضربني ونربع يديا
سلامك تخويني داري
وسلامي نتكمش ونغطي عينيا
وندير لفمي كمامة ونسد وداني
ونسد ايلا لقيت شي باب عليا
نقول لمخي تعطل
وندير النية ونعاشر الحية
المعقول هبل والدراع تشل والعز تكبل
والجهل اكبر رزية
قلبت فمخي على شي حاجة تنفع قصيدة
لقيت لكلام ما بقاش كلام
لقيت لفكار ولات حصيدة
كلا تها لبرودة ورشاها الدوام
كل حرف ونقطة ولات فيه مصيدة
ولات الكلمة شكال والمعنى مركب ليه لجام
قلت الشمس تدخل وخا من عين ليبرة
والعيشة عيشة
وخا بين الصفيحة والمسمار
القضية قضية شرعية الداو ليا
وشكون يسكن وشكون يخويوه الدار
قالي واحد تخلط الشغل عليا
قلت لو ساهلة
السمسار لقاوه شفار
جابوه يفكهوم
قال انا قبال هدية
قالوا هذا وا لي يتزار
تمتم وقال غير بيكوم ولا بيا
ما زال يوصلكوم مني لخبار
واحد خور قالي ا ش هذ المرضية
هذ الناس لا شك خرج فيهوم عتبار
مشات ايامهوم
نزل مقامهوم
تنكس علامهوم
بقات فيهوم غير السمية
وكلامهوم ولا كلو خص وخيار
شي يقول علمانية
شي يقول اصولية
شي يرد القضية لعديان السامية
شي مع شي ضد الديموقراطية
وشي مزال يحلم بالقومية
وشكون بقا مع الانسانية وشي وشي وشي سماها ارهاب
ولا شغلو تجباد لوتار
وشي عمال يقول يا ناس يقدني لي فيا
لي يدو فلما ماشي بحال لي يدو فالنار
وتبقى الشرعية شرعية الداو ليا
وشكون ينصف وجحا دق فالدار مسمار