عيني عينك الخيانه والله برافو ياسلام
وعذرك الشيطان ومدري أيش وبرضو آسفه
ويش أقول أشعاد باقي الطعن فالميت حرام
الله يسامح كل قلب ٍ يستبيح العاطفه
الكرم طبع الأكارم واللئامه للئام
والنخل ماينزرع فوق الهضاب الناشفه
من لاوجود لك أنا خليت لك شأن ومقام
جمعت فيك اللي تناثر من سنين ٍ طايفه
رتبت فيك أنسان كانت كل أجزائه حطام
علمتك أن العمر يجري وأنتي لسىّ واقفه
علمتك أن العمر مرّه بأحترام وبلا أحترام
وأن الحظيظ اللي زمانه بالسعاده صادفه
علمتك أن النفس تأمر بالأسائه للكرام
وقلت لك الدين درب ومستحيل نخالفه
وعلمتك انك مهرة ٍ من فوقها يّشد الحزام
وأنك أنتي عين رجل ٍ كل شي ٍ شايفه
علمتك أنك عزوة اللي يضرب بحد الحسام
وأنك أنتي كلمة ٍ يبست على شفايفه
علمتك أنك بير فيها خير منزوف الغمام
علمتك أن الدلو ملك ٍ لليدين الغارفه
علمتك أنك الضياع من البدايه للختام
وأنك أنتي الهدوء اللي يجيب العاصفه
قد قلت لك العيب عيبك بين لحمك والعظام
ولايجي في جلد غيرك دم جرحك نازفه
سّد مأرب ماتأثر في سقوطه أرض شام
لكن أن الشام تبكي من عذاب السالفه
ويش أقول أشعاد باقي للسوالف والكلام
وكل وجه ٍ مثل وجهك قبل أشوفه عارفه
أعرف أن الريح تلعب بالسحابه والحمام
وأعرف أن الضلع ثابت بالسيول الجارفه
واحد بواحد ألف لأ واحد كذا هو التمام
وأنتي واحد ضرب ميه غير ميه حاذفه
كنت أظن أني سراجك في دحى ليل الظلام
و كنت أظنك في غيابي كنتي فعلا ً خايفه
وأثرك أنتي في غيابي خط ثاني وأزدحام
متمنقهه بطعم السوالف لآخر حد وكايفه
ياآنسه وين الوفا وأي حب وأي هيام
ولابقى بالكون رجل ٍ ماعرفتي هاتفه
حسبك كيف كنتي مبدعه بأسم الغرام
وكنتي أجمل لحن كذب وكنتي أفضل عازفه
بالخيانه تستحقين الجداره والوسام
لأنك أنتي فعلا ً أنسانه غبيه وتالفه