ياشيب عيني من عذابي وانا حي
وياتعب قلبي من هواجيس بالي
يطويني التفكير طيٍ على طي
شيبت قبل الشيب واعزتالي
دموع عيني مرويه خدها ري
من واهجٍٍ بالكبد يصليه صالي
أن قلت مكسور الجناحين فشوّي
حتى الظهر مكسورمما جرالي
حملي ثقيل ولقدر أروح واجّي
مدري قدرها حان ولابرالي
دنيا تقلب كنها النار والضّي
ياسعد منهو خالي الهم سالي
لاتامن الدنيا ترا غدرها سي
لونك محصن بالقصور الطوالي
مادامت الغيري ولا دايمه لي
كم من ملوك الارض جاله زوالي
هذا الزمان ودايم العمر يطوّي
من لايجيه اليوم ياتيه تالي
يلادمي تراك مامر ومنهّي
وحكم القدر مايمنعه كثر مالي
واللي زرعته باخر العمر تجني
تاخذ ثمن زرعك وغاب الريالي
في ماقفن مافيه عمٍٍ ولاخي
محدن يبي يعطيك لو كنت غالي
كلن يقول النفس نفسي ويمشي
نجات نفسه مالتفت للعيالي
دنياك مثل اللي مشي واستضل في
لا تعدها لك راس مال وحلالي
والعقل في راسك ترا النفس تغوي
احسب احساب الاخره والسؤالي
وان طعتها تراك غادي ومخطي
لاتطيعها مردها لزوالي