ادورك يا صبر وينك اجيت مضيع الدربين
گلي بيا درب امشي وانه معاشر مرار البين
مهلاً يا صبراً
بكتر مني الشمس طاحت
وانه مسامر فقط ذكرى
واعاين عالصبر ماكو
اعاين عالشمس حمره
طاوعني ولا تعصي
أنا بصدري لهب جمره
وما يطفي الجمر إلا
من ماي الصبر نهرين
مهلاً يا صبراً
يگاودني الحزن وياه
أسير وإسرتي بالهم
حط سيفه على جِيدي
وضل يذبح بوجه باسم
اجيتك والقلم نوحي
اجيتك والحرف ما تم
أنا وكل الأرض ننعه
بمصاب النحر يحسين
مهلاً يا صبراً
حزين ودمعتي بعيني
انزل بالدمع واكثر
وأعاين والبصر لمحة
أصد بمنحرك كوثر
وارسم بافكر طفك
وما يرضى الگلب يصبر
واگله يا گلب أبچي
وأعمي بالدمع كل عين
مهلاً يا صبراً
أنام بحسرتي مهموم
واگعد بالصدر خنگه
وادگ اعله الصدر مخنوگ
وأتخيّل أثر سحگه
ومثل نار الخيم عندي
واحس بداخلي حرگه
تجسد لي الحزن بالسيف
عليك اتناثرت صوبين
مهلاً يا صبراً
من الروح اجت صرخة
ويترجمها القلم يشرح
هذا حسين ضل وحده
يصارع والدمه تسفح
طاح أعلى الثرى ابلا حيل
وبسيفه الشمر يّذبح
وعلى المخيّم اعيونه
يشوف الجيش شب نارين
مهلاً يا صبراً
خلص حده الصبر لهنا
گضه بطيحة أبو اليمه
سحگو عاليتامه أحقاد
مثل ما سحكّو جسمه
وخلو كل طفل مهموم
هذا الكدّر بهمه
والأصعب لو نويت تگول
سبايا والدرب لا وين
مهلاً يا صبراً