لمر بي دربي على موطن الديم
جاد الكريم ورشرشت في سمايه
وعبرت منها في يدي ميسم الميم
خلقٍ خلقه الله من آياته آيه
أصوغ من شعري لسمعه ترانيم
ويقول من شعرك يشعشع حلايه
جليل قدر ولا بغيت احذف الجيم
ويطيح شيء ما ركد به هوايه
كنّه خيار الوضح وسط المجاهيم
الشوف يرتع به من اول بدايه
غيور حد الغيرة تجيب له ضيم
وطموح لنه ما تخير سوايه
خلاني أدندن سنين (المعازيم)
وخلاني اكتب له هيامي روايه
الين سرت الدرب في حبه مهيم
حبٍ له ابدايه ولا له نهايه
يشوف قلبي صورةٍ دون تعتيم
ويفحص شراييني ويصرف دوايه
يقدر بكلمه يوصل القلب للغيم
وبمثلها يفسد ويدمر ثوايه