حزين لكن خل حزني على جنب
انا معك مابي للأحزان طاري
اللي كواه البعد ، لا جرّب القرب
ل( الخوف ) تلقى في عيونه مواري
وانا معك خايف ، وفي مأمن الحب
مابي اجي واشكي عليك إنكساري
يا أول الفرحة ويا أجمل الدرب
مشوارنا خلّه يكون اختياري
ما أجبرك ، مابي تحس الهوى غصب
ابي تحس انه قرارك / قراري
عش اسهله تلقى طموحك الى الصعب
يستعجلك داري ويمهلك داري
وانا معك ب( جنون ) عقل ، وهُدى قلب
تزرعني ف( نبضك ) ، وتجني ثماري
مشاعرٍ من صدقها ترفض الكذب
مفعولها لو قصّر الحظ ساري
من ضيّق احزاني الى فرحك الرحب
في واضح حضورك ب( عتمة ) نهاري
يطول عمر الوصل والهاجس العذب
يبقى ، وحس الحب ف( القلب ) جاري