قالت بحبك

قالِت بحبَك

بس حُب جديد

ممنوع تلمسني

لَمِس بالإيد

قِلْتِلها اللي

بيزرَعْ الكرمات

مجبور منها

يُقطُف عناقيد

قالِت عِند ما

بتقشع العنبات

غِضّ النظرْ

وتفرَّج من بعيد

قِلتلها بعنقودِك

الحَبَّات

ما بِترِكُن غير

ما يصيرو نبيد

قالت أنا نحلِة

من النحلات

لا غِشْ في

عندي ولا تقليد

قِلتِلها الدبور

للعَسلات

مش رح يوفِرهُن

لِيوم العيد

قالت أنا بحبك

بلا غايات

قديش صَرلي

هالكلام بعيد

لا تِغّرْني

ولا تكبِّر الفَشخات

ما فيك تَعمِل

متل ما بِتْريد

قلتلها يا

مسَييجي الوردات

لو الميّ بدا

توقَفْ عواميد

يما إسمَحيلي

فَرفِك الحَبقات

يما تركيني هيك

واعْفيني

من حُب لا بينفَع

ولا بيفيد