حبل الخلاص من يوم مابنتولد مقطوع
أحنا اللي يوم عن يوم يكبر معانا الجوع
مكتوب علي خلقتي
أضحك وأنا موجوع
كان حلمي أزرع ولو
من غنوتي حرفين
لفيت أراضي الغنا
مش عارف أزرع فين
هوا الغنا ضدنا
واللا أحنا مش فاهمين
الضيق مساوي الفضا
والورد زي الشوك
والماضي راح وانقضا
كله ف طريق مسكوك
وإن بكره عشناه قضي
ماأحناش هانبقي ملوك
وأحنا ملوك نفسنا
وأحنا أساس همنا
إن الأمل همنا
ومضيعين حلمنا
بيننا وبين بعضنا