ياما مسحت دموع وافرحت مهموم
وياما فرجت لضايق الوقت لا جاك
وياما دعى لك بآخر الليل مضيوم
وياما عطيت وما تعدد عطاياك
وياما بذلت الخير من طيب وعزوم
وياما شبع جيعان لا صار بحماك
البذل في يمناك عادات وسلوم
ويسراك ما تدري عن افعال يمناك
الخير في وجهك مبيّن ومعلوم
يا شيخ والله ما تعدد مزاياك
من صغر سنك عشت يا شيخ لليوم
على طريق الحق نهجك ومبداك
يا ولد عبد الله العمر محتوم
رحلت لكن سيرتك فوق الافلاك
عسى جنان الخلد لك حق مقسوم
ومنزالك الفردوس الاعلى ومثواك