ما تخممش وبلا ما تجيك غريبة

مَا تْخَمَّمْشْ وْبْلاَ مَا تْجِيكْ غْرِيبَة

وَلاَّ تْقُولْ مَالِي مَنْ دُونْ الْبَشَرْ

الْفَرْقْ لِّي كَايَنْ انْتِي لَحْبِيبَة

وَمْكَانَكْ بِينْ الشَّمْسْ وَالْقَمَرْ

وَاخْدَة نُورَكْ مَنْ الذَّهْبِيَّة

وْمَنَ الْقَمَرْ سَرّْ الْجَاذِبِيَّة

حْدِيثَكْ كُلُّو حُبّْ وْرُومَنْسِيَّة

مَسْكْ الِّليلْ يَعْشَقْ مْعَاكْ السَّهَرْ

مَا تْجِيكْشْ غْرِيبَة عَلاَشْ مَغْرُومْ

فْوُجُودْ الْقَمَرْ فَاشْ جَاتْ النّْجُومْ

خَلِّي لّي بْغَا يْلُومْ غِيرْ يْلُومْ

الْعَاشقْ مَحْسُودْ يَتْوَخَّى الْحَدَرْ

وَشْنُو نَبْغِي كْثَرْ مَنْ حْيَاتِي

رَاحَةْ بَالِي مْعَاكْ وْرَاحَةْ دَاتِي

انْتِي لْبَاسِي لَمْفَصَّلْ لَمْوَاتِي

وَانْتِي الشِّعْر وَالنّغَمْ وَالْوَتَرْ