الحكايه ميت حكايه
تحكيها قلوب الضحايا
كلها بدموع ونار
اتكتب ليها النهايه
وانا درويش داب في حبك
قال مدد يام الملايه
لف. يا أجمل صبيه
يابهيه
ياشهيه
حتى وانتي بتستخبي
مني خلف المشربيه
وانا اشوف نظرة عيونك
باشتياق ماكنتش ليا
كنت عاشق للشوارع
للحواري
للبيوت
كنت دايب في هواكي
نظره تكفيني واموت
كنت راسم حلم عمري
اني اكون حارس ترابك
اني اكون لقمه في جوعك
وفي العطش اكون شرابك
بس فجأه لقيتني حارس
ع اللي بإيديه كان خرابك
رحت أجري أشكي همي
ياللا هِمي
افتحي قلبي البرئ
صفي مني كل دمي
لو د شرط تسمعيني
وتكسري كل الحواجز
اللي مابينك وبيني
بس شوفتك ساده ودنك
رافضه حتي تلمسيني
تتطبطبي زي زمان
مش هاأقولك تحضنيني
ليه بقيتي بقلب قاسي
ليه سكتي ع المآسي
ليه وليه وألف ليه
دايره بتكسر في راسي
لسه برده ساده ودنك
لسه ناكره إني إنك
بعد إذنك
مابقتيش خلاص مكاني
مابقتيش الحلم الاخضر
اللي مزروع بالأماني
اللي عشت العمر كله
أحلمه وهاحلمه تاني
بس رغم دا كله باقي
لسه باحلم بالتلاقي
لسه باحلم يوم تحسي
بقلبي وبنار اشتياقي
واللي بعتيني عشانه
بكره قلبك يكشفه
ومن كشوفك يحزفه
واجي انا وأقعد مكانه