يقول من حده زمانه على البوح
هذي رساله وصلوها البريدي
مضمونها بدري تعلمني النوح
وتفصيلها مما يلي بالمفيدي
اقولها من قلب ماهي ترى مزوح
فرقاك عندي عيد واليوم عيدي
ارجوك تنسى نايف اليوم وتروح
خلك بعيد هناك وانا بعيدي
انا نسيتك وانته اليوم مسموح
فارق عيوني لاتزيد وتعيدي
قلبي جريح وزدته اليوم بجروح
جرحٍ قديم وجرح توه جديدي
ويامل قلبٍ يشكي الجرح مذبوح
من جرحها ينزف خفوقي قصيدي
هانت وعدت والامل توه يلوح
يلوح برقه والبشاير تزيدي
يامرحبا ترحيب يامهجة الروح
من وسط لندن لين حي السويدي
ارحب ياغالي واقلط القلب مفتوح
واجلس وكوع يابعد سيّد سيّدي
واضيفك دله من الشوق وتفوح
واقدع من عروقي وحل بوريدي
انت القمر من طلتك صار مفضوح
وكل الكواكب في جمالك تشيدي
وافي وغير الزين جذاب مملوح
يفداك كل العمر واللي تريدي
امر تدلل صدري اليوم مشروح
لجلك نّلين كل راسٍ عنيدي