لا تحسبني يوم صديت ناسيك
يلي بقلبي ما تغير مكانك
ابقى وفي مخلص وأقدرك وأرضيك
واطلب من الله ما يحرمني حنانك
أشيل همك واعتني بك وأداريك
اشتاق لك أنت الوحيد بزمانك
من زود شوقي ودي أصرخ وناديك
من لهفتي أبي ارتمي في أحضانك
مثل الصغير يوم تحضنه أياديك
يأمن على مستقبله في أمانك
فاقد حنان وكل محتاج له فيك
سبحان من صور جمالك وصانك
الله سبحانه من الحسن معطيك
روعة جمالك روضةٍ من أجنانك
شفه يشاهد روضة الحسن مغليك
خله يمتع ناظره من أحسانك
بمشاهدك وان كانه الشوف ياذيك
لا عاش من كدر حياتك وهانك