يا رب ياللى كان بيا
لوحدو عليم
وكنت بدعى تزيل ضرى
وأبقى سليم
ولما الموت قرب منى
فرحت وقلت
هموت فى أول الرحمه
وأقابل وجه رب كريم
ونا الزاحف ومش خايف
أنا م الموت
منا ياما قابلت الموت
وياما ياما كنت سكوت
وكل ما أبص ف الشاشه
ألاقى دمنا أنهار
شعوب بتموت ولا تدرى
وقائد للجيوش مغوار
إذاعتنا تملى تقول
أم وطفلها مقتول
وكل زعيم ف بلادى سيف
بس ع الشعوب مسلول
جراحكم يا عرب نازف
ووقت العزة مش آزف
يا خوفى أموت على فراشى
ساعتها هكون مابسواشى
وأكون عارف
ان موتى فطيس
وكان أملى
أموت واقف