مَعَ .. وَناتِ أشواقي .. تِزيد الرَغبة .. في حلومي
و أنا كِلي حِكاية حِلم .. قَبل لا اكون إنسانه
حَياتي مَسألة مَبدأ .. أصارِع لَجلها .. يَومي
و أتحَدى مُعاناتي .. وأصرِح .. إني ولهانه
أجي لِدروبي الغِلقه .. ألاقي مَرقد همومي
و أناشِد كِلِ مِن مَره .. وسِكانه وأعيانه
ألا يا قَلبِ ما يِرأَف .. بِحالٍ صارِ مَغمومي
و يِتمادى بِتَحطيمي .. وشوقي يِنهي عِنوانه
غَريبٍ حَالِ هَالدِنيا .. وكِل مِن فِيها مَظلومي
وحَتى الحُب يا أهله .. تِلاشَى بَينِ أجفانه
عَجيبٍ حَالِنا والله .. ضَعيفٍ صَعبِ مَهزومي
كَئيبٍ بَاردٍ يا قَلب .. وذابَت كِلِ ألوانِه
رَسَمنا عَالمٍ ضَايع .. بِزيفِ الوقتِ مَرسومي
عَلى أوراقِنا الصَفرا .. كَتبنا قِصةَ أشجَانَه
وسَطَرنا قَوافيها .. عَذابٍ .. بَاتِ مَكتومي
و صَرخَاتِه .. شِظايا صَمت .. تِوارَت بَينِ أحزَانَه
سِكوتِه كَانِ لي خِنجَر .. يِجَرِح نِطقِ بِلعومي
و يِنهَش في حَنايا قَلب ..ذِبَل مِن كِثرِ أوجَانِه
تَعبت وخَارَت القوه .. وصَار الودِ مَعدومي
شِعوري ضَامِر بجوفي .. وروحي تِلهِب أحضانَه
أنا مَا قِلتِ بَتراجَع .. ولَكِن مَاتَت عزومي
و كِل ما قِلتِ بَحييها .. أشوف اللِعبة خَسرانه
حَرمني هَالزَمن فَرحَه .. حَرمني حَتى مِن نَومي
و أنا كِل مُنيتي .. ألقى .. بَعض مِن نورِ إيمانَه
مَدام الحَقِ في هَالكون ..ضَريرٍ حَيل مَذمومي
أبي زَيفِك يِغَطيني .. وأنسى .. شوقي وأزمانَه
خَلاص .. إنسى رَوابينا .. وإسمَع آخر علومي
بَعَد كِل مَا جَرى ليا .. هَجرت الحَرف وأركانه
نَعَم إحساسي ما أنكِر .. كِفاية .. تِِمتهِن لومي
و تِنسى إننا .. عِشنا .. عُمر بِالخوفِ وإدمانه