مابين نظمي للجديد وبين طاروقن قديم
ضاعت بدايات القصايد بين ليت وليتها
ياكم من صفحه حوت مطلع قصيده فالصميم
لازل ثلث الليل الاقشر خاطرٍ… شقيتها
اصارع النفس الضعيفه والعن ابليس رجيم
وادعيك ياربن عبادك ماقُبلْك دعيتها
على الثبات اليا عبرنا بالصراط المستقيم
يارب عونك من لدونك وحاجتن سميتها
لايانديمي ياعلي ياكيف ماعدك نديم
وانته وانا مثل الملوك الي يجير صيتها
يوم ان حايفة الكدايش مايضدون الخصيم
ولاهدفو قبّا تشوق العين لاناديتها
انت اتعنى للطروق الي بها الخاطر محيم
وانا لمن عسر الطروق تصيح لي لبيتها
انادم افكار الشعر واسامر الليل العتيم
واعنّ شقرى مالغير الكايده عنيتها
في جال ضوء من قشاش الحب واشواقي ضريم
واطالع القمرى واقول الله لاطريتها
ياخل في وصلي شحوح وفي بذل بعدي كريم
اخلفت قانون الحياة وحست في توقيتها
كنت الحريص الين شفت عيونك وصرت الغشيم
وطبيت في دوامتن ماقبلكم طبيتها
ياناشديني كيف قلبي في هوا النجلا يهيم
والله ماعرف لو اعرف اعجوبته حليتها
الي اعرفه بان قلبي في هوا غيره عقيم
والقافيه في غير وصفه مابعد ضريتها
لاتنشدوني كيف قلبي دكته نظرات ريم
فلانشدته كيف روحي يالغضي دكيتها
ياكم حيدٍ دُك صلبه من ورى قطرات ديم
ماناشد الحيد القوي ياديم كيف قويتها؟
ياعاذليني في هوى من حبها فيني مقيم
الله يجعلكم نذورٍ عند من حبيتها
عين المهاه الي تضد بزينها كيد الحريم
وتقول ماغيري يحل فقلب فيصل بيتها
ياحب مايشهد عليه الا انت يافردٍ رحيم
يانار شوقن في خفوقي لاهدت صاليتها
اشتاق لك شوق القفار لنوض براقٍ وغيم
واحن لك حن الخلوج الي تحن لميتها
يالذ من شهد العسل واحن من هب النسيم
يالي طيوفك من غلاتك لالفت ضميتها
ترا الفراق اكبر مصيبه يكسر القلب اليتيم
يجدد فجوعٍ علي مررت ولاناسيتها
ودك تعرف اذا الوداع ارخى على قلبي بضيم
وش وقع روحي لا رحل طيفك وطفّى ليتها
كن العرب وسط الحرم عند الركن خلف الشريم
علي يصلون الصلاة الي ف ابي صليتها