والله اني كارهن دربن شقاني
درب حبن قاسين عندي مطبه
فارق الجمبين واتلاها عطاني
جرح والله فيصلٍ ماحتال طبه
ياشبيه الريم ياسيد الغواني
يانديب المزن في شحه وصبه
ليه تجفى من يحبك يا اناني
والله ان اغلى ماقد ولّاك حبّه
شفت يومك مقفين وانا مكاني
انكسر قلبي وصمت الخوف دبّه
ماقدرت اقول ياقلبي ثواني
احجر الصيحة ودمع العين خبّه
الا والدمع الغبين الريهجاني
بلّل القاع القفار وصار غبّه
ماعليك اليا ابتسم سني تراني
اتحاشى مايلقّي الدمع سبّه
لاتغرك قشرة وساع المحاني
والله إن المعْضلة في جوف لبّه
تل قلبي تلّة حبال السواني
وحرّ جوفي من لهيبٍ زاد شبّه
ليتني يوم ابصر سهيل اليماني
مايطرّا ذعذع الشرقي وهبّه
وليت شعري ماتهلهل من لساني
وليت قلبي ماهوى من لا يحبّه
والله انه ياخذ الي به بلاني
ولعنبو من يحسب ان الحب هبه
اقفلو درب المحبه مايداني
طاريه قلبي عقب ما الدرب ذبّه
وعلمو اهل الوفا واهل التفاني
المحبة كذب والصاحي تنبّه
ودعوني والعذر جاني ماجاني
واطردوني من قروب اهل المحبه