ياللي جاي وهاتراقبني
يا أبويا واخويا وابني
لو صحيح عايز هاتبني
يبقى بالقانون هااحاسبك
يبقى بالقانون حاسبني
آه وإلا
وافتكر مابعد إلا
شعبنا ماعلوهشي ذِله
وكرامته عنده
دين ومِله
لو هاتعدل
يبقى ليك في الحر ضله
نبقى إيدك
نبقى عيدك
يبقى شمس الحب هَّله
ولو هاتعوج
يبقى شوكه ف قلب ضهرك
نبقى عِله
يبقى ريح تقلع شراعك
يبقى بُكره المش بتاعك
يبقى أول حد باعك
وافتكر
قبل ماتقول شعبي سابني
إحنا زي البحر لما يهيجله موج
يتفتح
تعبر طريقك بالسلامه
ويتقفل
ماتلقى منفذ للخروج
باختصار
احنا شعب
لسه ماحدش عرفله
كتالوج