كنت أتوقع لا مضى يومك تحن
وظنيت ترجع وانت للحين غايب
بعض المشاكل عذر لمدور الزن
فرصه يحصلها لحزم الحقايب
ولا الزعل منه العلاقات تمتن
ملح المحبة ما يسبب نشايب
وتوضح اللي للعلاقة يثمّن
ما يرخص الثاني مع ادنى هبايب
وإثنيننا للحق والصح نذعن
دون انتمادى في طريق الطلايب
بالعكس حتى قبل تكبر وتسمن
والكل للآخر بالأعذار جايب
وأنا أخبرك غير عن ما يسوّن
من حرصك الزايد كإنا قرايب
لك قلب متسامح ولا يعرف المّن
ولك خاطرن من قبل نرضيه طايب
وقالو كبار العرف والشِعر والفن
خِلك إلى من غاب عنده حبايب
وياما أظن وأخلف الظن بالظن
عل وعسى أطلع بهالظن خايب
وإما تجي تنقض قبلما أتيقن
إن اللذي قالوه بالحيل صايب
ولا أتعوض خالق الإنس والجن
وأصير عن درب المحبين تايب