يالله اني وازيٍ بك من صدوف الليال
كلّما وقتي هزمني توضّيت وشكيت
جلّ شانك يالّذي في سماواته تعال
مخرج بقدرتك حيٍّ ومحيي كل ميت
نجّني من ضيق ذنبي ومن سوء المئال
ميقنٍ لا حلّ عفوك عليّ انّي نجيت
كم ركى متني لحمل الصعيبات الثقال
ولا كسرني غير بعدك علي يا من هويت
يسقي الله كلّ ذكرى وموقف به خبال
وكلّ ضحكه لا طرت لي وانا وحدي بكيت
ويسقي الله ليلةٍ ذقت فيها من الزلال
كانّي اللي ميّتٍ قبل ما اجيك وحييت
كلّ ذكرى من وصايفك لي فيها خيال
طارِيك من وقت ما يلوح في فكري سريت
وان قضى الله بانّي اراك ويعاد الوصال
عانقيني لين روحي تناسى كلّ ليت
اذكريني لا قريتي قصيد اهل الجزال
ولك عليّ انّي لاخلّد على اسمك كلّ بيت
واعذريني لا تصادم وصالك بالمحال
ناويٍ وصلك والاقدار تبطل ما نويت