وييجي الصوت
من أبعد مكان فيه صوت
ألاقي حروفه تناديلي
أغنيلها... تغنيلي
يرق العود
يصحي نبض مواوييلي
يِسّهر بالبُكا ليلي
آهين ياوجعي ياموعود
وآه ياخنقة العاجز
وآه ياصرخة الميت
ماهي قادره تِطًَََيب جرح
وآه ياخطوه بتسابق علي الفاضي
مُناها وصول لأيها فرح
ولساها
سجينه جوه أحزانها
وسجانها
لا راضي يحن ويسامح
حصان جامح
وشاف الكل بيسابق
ووصلوا لبُكره من بدري
وهو لسه ف امبارح
غريبه ياغربه جوايا
ولافف مركبي ف بحور
ومشتاق يرسى يوم علي شط
لكن الدنيا نسايه
ومرسايا
في غفله ضاع وضيعني
وراح لبعيد
لأبعد مايكون الصوت
لحد الموت
وانا اللي كنت متعشم
يكون لحظه قريب مني
ياخدني ف حضنه ويطبطب
يطمني