أنا إنتو

أنا .. إنْتُو ..

أنا لا تِسْألوني

لَشو طَلِّ القَسا بْعِقْدِة جْفوني

فْطَمِتْ جُودي بَعْد ماكِنْتْ بَيْدَرْ

يِجُو .. حَبِّة وْحَبِّة .. يْنَقُودوني

كِنِتْ إسْهَرْ

وْشوف اللَّيْل أقْصَرْ مِنِ الْحِلْم

الْ عمِ يْداعِبْ ظْنوني

وْما قِدْرِتْ عَ السّْريرِ الأمّْ تِسْهَرْ

لَو ما تِشْتِري يَقْظِةِ عْيوني

طْلَقِتْ فِكْري

بْجَوانِحْ نِسِرْ أسْمَرْ

وْصارُو يِرْفَعوني وْيِرْفَعوني

حَتَّى صِرْتْ شُوفْ الأرْض أصْغَر مِنِ اللِّي عَ التَّحَدِّي بْيِطِلْبوني

وْصِرِتْ

مِنْ حارْسينِ النَّارْ أكْفَر

وْجَنَّنْت الْعَواصِفْ مِنِ جْنُوني

وْما جَنَّنِّي الزَّمانْ

وْلا الِمْقَدَّرْ

فقَطْ أهْلِ الِمْعَنَّى جَنَّنُوني

وْما جاييْ بْرِفْقِة الزَّغْلولْ إكْبَر

عَ أحْلام القَساوِة ..

واللِّيُونِة

جاييْ بْجَوْقْتي تَوِّجِ الْمَنْبَرْ

وْخَلِّي

بْقَلْب هاللَّجْنِة الكَريمِة

الْ بَعْد مابْيَعِرْفُوني

يَعِرْفُوني

كان الشِّعِرْ مِينا بْلا مَنارَة

وْدَهَبْ مَدْفُونْ بِزْوايا الِمْغارَة

رِجِعْ ميشال (1) هالْحَفْلِة تْبَنَّى

لَقَى مْحِبِّينْ

مِشْ صَفْقِة تِجارَة ..

الْ كانو يِهِرْبو بالأمْس مِنَّا كأنُّو بْكاسْنا عَدْوى وْمَرارَة

إجُو يِتْأكَّدُو إنُّو المْعَنَّى حِلِم أبْيَض

بِعَيْنَيْن العَذارى

يازَغْلُول لَوْالمَوْت امْتَحَنَّا

ضَرُوري نْقابِلِ الدَّهْرِ بْجَسارَة

دُرُوبِ الشَّاعِرِ رْماحْ وْأسِنَّة

وْعَ تُمُّو الضِّحْك

وِبْقَلْبُو المَرارَة

زَجَلْنا ..

مْلاحِم فْلِسْطين غَنَّى .. وْكَشَف كِلِّ الْوُجُوه الْمُسْتَعارَة

وْإلي

بْإسْمِ المْعَنَّى في وَطَنَّا

عبارَة

للرَّئيس وْللْوَزارَة:

إذا مْهاجِر بِأرْض الْغَرْب جَنَّى وْإلُو عَ مَوْطَنو

شَوْق وْحَرارَة

وْإذا بَدْكُنْ يْرَوِّجْ لَعِنَّا

وَدُّولو بْإسِمْ لبْنان شاعِرْ كَإنْكُنْ عمِ تْوَدُّولُو سَفارَة

زَجَلْنا احْتَلّْ ذُرْوِةْ إزدِهارُو

وْفَرَض، عَ كِلّ مَوْقَفْ،

إعْتِبارُو

انْطَلَقْ عَ الْكَوْن مِنْ سِجْنُو المْأبَّد

تَ يَعْطي النَّاسْ

فِكْرَة عَنِ عْيارُو

المِطْران الِقْلاعي(2) إبِنْ لِحْفّدْ، تْغَنَّى ..

والزَّجَلْ جَلَّلْ وِقارُو

والبَطْرَك العاقوري (3) تْوَدَّدْ

لَ هااللَّون الحُلُو

وْبارَك ثْمارُو

وْحَتَّى مارْ افْرامْ(4)

بْكِلّْ مَعْبَدْ أناشيدُو صَلا للدِّيْنْ صارو

وْ فخر الدَّين (5) للأزجال عَدَّدْ

وْقَصيْدُو للجَبَل رَجَّف حْجارُو

وْ ناصيف اليازجي (6) البَحْرَين أوْجَدْ

رِبي بْدَمُّو المْعَنَّى

وْما اسْتَعارُو

وْ إبِن نَخْلِة (7) نشيد الأرْز أنْشَدْ

الْلُّغة رِبْيِتْ عَلى خْميرِة دْيارُو

وْإلا بالمْعَنَّى ما اسْتَشْهَد

أميرُو وْسَيِّدُو (8 وْرافِعْ شِعارُو

وْ عَ أيَّامُو

إجا الشَّحرور أسعد (9)

جْناحُو مِنْ سَما بْدادون (10) طارو

وْعَيْنَيْن الملِك فاروق (11) جَمَّدْ

عَلى كَرِّة قَصيْدُو وْإبْتِكارُو

وْطريق الشِّعْر للجَوْقاتْ

عَبَّد تَ حَتَّى الكِلّ يِقْتِفْيُو أثارُو

وْإجا روكز (12) عَلى المَنْبَر

تَمَرَّدْ تَمَرُّدْ سيف عَمْ تِلْعَب شْفارُو

وْبَعْد ما بَدَّل وْطَعَّم وْجَدَّد

وْنال مْنِ الثِّقَة إكْليلْ غارُو

افْتَتَح دَرْب التَّحَدي بْقَلْب أبْرَد مِنِ التَّلْج

اسألُو الْ عِلْقُو وْتَبارُو

وْبِقي الجَوْق الخَليلي

حِصِنْ أصمَدْ مِنِ الْحِصْن الْ كِعي اسكنْدَرْ (13) حِصارُو

بِقَفْلِة حاجْبُو

في ليل أسوَدْ عَ هالْعِمْيان ما بْيِطْلَع نْهارُو.

وْهَوني ..

بِنْصَح الزَّغلول يِبْعَدْ .. أشْرَف ما يْتَلِّتْ إنْكِسارُو (14)

وْبآخِرْ مُلْتَقى ألله بْيِشْهَد ..

بِقَلْب الدَّيْر (15)

أيَّا جَوْق مِنَّا بَدُّو يْلُوح بَيْرَق إنْتِصارُو

اشْهَدي بالدَّيْر يا أقْدَم قْلاعي

عَ سَطْوِة جَوْق بو الخلِّ الرُّباعي

وْيازَغْلُول ..

ما بْيِسْوى التَّجَنِّي ال ظَّهَرْ مِنَّك عَلى البَثِّ الإذاعي (16)

عِشِتْ حَدِّي عَواطِف مِسْتَكِنِّةْ

وْبِإيْدي كِنْت أطْوَع مِن يَراعي

لَكِنْ .. مِنْ بَعْد ما بْعِدِتْ عَنِّي اسْتحى مْنِ لْسانَكْ

لْسان الأفاعي

إذا عَ النَّصِر جايي تِمْتِحِنِّي

أنا .. اقْواسِ النَّصِر شَقْلِتْ كْواعي

وْكِتِر ما الدَّهْر .. بالْخِبْرَة عَجَنِّي

انْوَصَلْ عِمْر الزَّمان بْطول باعي

وْشُو بَدَّكْ تْغَنِّي تَ تْغَنِّي ؟؟

أنا بَحْر .. وإنِتْ ..

صّدْفِة بِقاعي

وْصِرِتْ عايِشْ عَ هاجِسْ رُعْب مِنِّي:

طَيْفي بْيِرِعْبَكْ لَو كِنْت نايِم وْإسْمي بْيِرِعْبَكْ لَو كِنْت واعي

شِفِتْ عَ جَبِهْتَك مَسْحِة كَآبِة

ابْتَدا عَ شَيْبْتَكْ يِشْفُق شَبابي

احْتِجِزْ حِمْلانَك بْقَلْب العَمارَة

قَبِلْ ما يِفْلَتُو عْلَيْهُن دْيابي

وْحَتَّى يْخَبّْرُو جَوْقَك تَبارى مَعِ الْجَوْق الْ ما بِيْضَيِّعْ إصابِة

بَدَّكْ تِلْتِجي لْ عَذْرا العَذارى

وْتِتْمَرَّد عَلى الطِّيْن التُّرابي

وْمِنِ البُركان .. تِسْتَقْرِضْ حَرارَة وْمِنِ الْجَلْمُود .. تِسْتَقْرِضْ صَلابِة

وْمِنِ السَّبْعَين .. تِسْتَقْرِضْ جَسارَة

وْمِنِ السِّلْطان .. تِسْتَقْرِضْ إهابِة

وْمِنِ الْخِيَّال .. تِسْتَقْرِضْ مَهارَة

وْ عَ قَلْعَة !!

بَيْنْها وْبَيْني قَرابِة .. انْ سَرَجْت الدَّهْر حتَّى تْشِنّْ غارَة

بْيِبْقى الدَّهْر أوطى مِنِ رْكابي

إنِت مُطْرِب مَعَكْ جَوْقِة تِجارَة: قِسِم كَوْرَسْ .. قِسِمْ يِعْزُفْ رَبابِة

وْإذا مُعْجَب بِصَوْتَكْ (17) ..

عَنْ جَدارَة !!

عَلَيكِ الأوْف ..

والباشا المُلحِّنْ .. عَلَيه اللَّحْن،

وعْلَيْنا الكِتابِة

اسْتِحي مْنِ البَحْر

يا نَبْعَة شْحيحَة .. وَلا تْتَّلِّتْ فَضيحَة عَ فَضيحَة

الْعَيْن مْفَتّْحَة عْلَيْنا بْعِنايِة .. بْمُلوك العامِّيِّة والْفَصيحَة

إنِتْ بالشِّعْر مِشْ مِنْ مُسْتَوايي وَلا خَرْج المُباراة الفَصيحَة

إنِتْ بال تَّلْفَزِة خَرْج الدِّعايِة (18

لْ نينِكْس وْباتَّا وْصابونْ رِيْحَة.

وْبَعْد ما كِنْت نَهْنَهْتَك كْفايِة وْعَطَيْتَكْ للهَرَبْ آخِرْ نَصيحَة

بِأيَّا قلْب .. يازَغْلولْ ..

جايي عَ شاعر، وَثْبِةِ النِّمْر بْطُموحُو .. وْبِعَيْنُو

غَضْبِة اللَّبْوِة الجَريْحَة !!.

وْهَلَّق يا أبو روكز الغالي ..

عَلى التَّطْمين .. بِبْعَتْلَك رِسالِة:

ما تِفْزَع تا يْرُوح التَّاجْ مِنَّا ..

بْطانِة تاجْنا نْجوم اللَّيالي

نامْ ..

بْفَسْحِة الوادي ..

تْهَنَّا عَ أحلام الْبُطولِة

والبَسالِة

قَطَعْنا الدَّرْب .. وِبْقينا بْوَطَنَّا أسْيادِ القَلَم

والإرْتِجالي

وْإذا بْيِتْغَرْبَلُو رْجال المْعَنَّى مِنِ الشِّعَّارْ

ما بيْضَلّْ إلا:

أنا .. وْجِريُسْ وْبُطرُسْ والفغالي (19)