سَمِّي، سّم الله فراقك، وسلَّم هالحلا
فيك، يا صفوة مخاليق ربي من حِسان
قال قلبي قبل ما اقول: يا ميّة هلا..
يوم بوحك رتَّب الضي، وغنى زعفران
أقبلي يا أعذب النور والماء والملا
وادخلي من حيث ودِّك على قلب الأمان
ما تيسر من غناوي ثغَرك من الغلا
ينسكب لين آخر اعماق مفتونك حنان
يا بَعَد كل الصبايا، عساني ما خلا..
من حضورٍ يشبه الحلم في حور الجنان
وانتي من تكتب على البال والروح وعلى
مهجتي، إن أجمل البوح طبع القحويان
لولا عقلك كان اشبهك في ريم الفلا
ولولا قلبك كان يمكن ذكرت الخيزران
فتنتي، لا الشاعر اقفى ولا العاشق سلا
على خبرك، من هذيك الدروب لهالزمان
مثل حبي لك يكون المطر، وإلا بلا..
ومثلك انتي يا نَهَر عمري تكون الحسان