بسير متعني وقصاد

بَسير مِتْعَنّي وقَصّادْ

بَلوْف بوراشِد وباييه

شيخٍ على العادات معْتاد

يْبِشّ يوم يشوف لافيه

وهاذي وراثه عِند الأجداد

هذا الكَرَم والطّيب لي فيه

قايِدْ حِما الدّولَه وِلِبْلاد

فارِسْ ولا حَدٍّ يِباريه

حَقّ المَعالي دوم رَوّادْ

والمُسْتَحيل بعَزم يَثْنيه

لِك الشِّعر مِطْواع يِنْقاد

وِلْنا الشَّرَفْ نِتْبَع إثارِيه

يا شيخ يِيتِكْ دون ميعاد

واحساسنا الصّادق نبَدّيه

سَبْقِك لِنا من أجمل اعْياد

ونفرَح إلي يَتْنا طواريه

عَسى ان هذا السَّبْق يِعْتاد

واللّي تودّه تِي تَهانيه

وعَسى ان وَقْتك كلَّه اسعاد

وجَوّك صَحُو ما شَيّ كِدَرْ فيه