تريد الحب و إلا ما تريده
مردِّك له بلا شرع و عقيده
غصب يفرض على الدنيا وجوده
لو إنّك قاسي ٍ مثل الحديده
تحاول تخفي الأشواق عينك
و نار الشوق في قلبك تزيده
يصير المرّ في طعمه حلاوه
و تحلى به مآسي في الجريده
علامك تبتئس و الصّدْر ضايق
مع ان الحب يرسل لك بريده؟!
سهام العشق ما تخطي هدفها
تصيد اللي رصاصه ما يصيده
يطيح اْ بها القوي من دون رايه
طعون الحب و إن لانت شديده
تعوّدنا نكذِّب في المعاني
نكابر في مشاعرنا العنيده
تعوّدنا نقول الحب (( كلمة ))
يعَرف الحب من يكتب قصيده
و لو إنِّ العِشِق أوَّل شقانا
يلوّعنا ... و لكنا نعيده
وإذا ما كان للأشواق دنيا ؟
فأنا بأخلق لها دنياً جديده !
وللعِشّاق بأكتبها مشاعر
يدوم الشعر ما يبلى جديده