تهاوت نجوم وتساوت بعيني نجوم

تهاوَت نْجوم وِتْساوَتْ بِعَيْني نِجُوْم

رَغْم أنّها تخْتِلِفْ مِثْل البشَرْ في الوجود

يا بَارِقْ الْمِزْن وِشْ لِيْ فِيْك دامْ الِغُيوم

تِمِرّ من دون لا تمْطِرْ وَلا بك رِعُود

لَيْن أمْس وَأنَا حَيَاتِيْ كَبِّلَتْها الهِمُوم

ويْمرّ عِمْرِي ما بيْن الْياس وَاقْسَى الْجِمُوْد

واليوم يا الْبَارِق الْمِبْطِي علُوْمي عْلوم

يا الله تمِدّ العِطا وِتزِيْد في الْجُوْد جُوْد

يَا اللَّى تحَسْب السَّعادة عِقْب حَبّ الْخِشُوم

مِبْطِي وَلا شِفْتها يا كُوْد ذِلّ وْقِيُود

دَامِي بصِحّة وْلا لِيْ في حَيَاتِي خْصُوم

الْحَمْد لله وجِعْل الْمَوْت حَتْف الْحِسُود

زَرَعْت طِيْب النِّوَايَا لَيْن غَابَتْ رخوم

وما شَدِّني يوم خاويت اخْتِلاَفْ الجلود

أصِيْل وَأصْحابي اللي مِنْتِقِيْهُمْ قروم

وبيني وبين الرِّدِيّة شاهقات الحيود

عَانَيْت لكِنّ مَا هَدّ الْعَنَا لِيْ عزوم

واسْقَاني الصَّبْر عِقْب الْكايِدَات الْبِرُود