ويلاه يا جرح ٍ من العام ما طاب
وهم ٍ على صدري منوّخ ركابه
ودمع ٍ حدر تالي الليل سكاب
عالي الوجن ناصع فخدي خضابه
وقلب ٍ تلف ماخذ من الوقت بحساب
يندب وليفه قبل ساعي ذهابه
يللي على بعده من الدمع صباب
وهتان حزنه مثل خول السحابه
ما يبري افوادي ترا جمع الأصحاب
وما تبري العله حروف الكتابه
وما يرد حالي مثل ما كان فأطياب
غير الوليف اللي تعمد عذابه
هو الدواء لوّن على البعد طلاب
كل الشفا قربه وريحة ثيابه
حسنه على حسن الغرانيج كساب
سبحان ربي لي موفي حسابه
يالكوس شف حالي على بعد لأحباب
اسعف لزيمك لي عذابه سرى به
لن طاب حالي جرحي العام ما طاب
وا شيب راس اللي مودع شبابه..
يسقي ديار النيد مالودق سحاب
ريح الجنوب إن هب عجلن سرابه
وسمي يزف بمزنته برق لعاب
غطا عيون الكون ري السحابه
ألفن هلا وألفن على العين ترحاب
بأهل الوفا وأهل السخا والنجابه
بيتك وبيت العز يالغالي انساب
بيتن طرقته يالغلا رد بابه
الحب باب وطرقته تفتح أبواب
يا عون قلبن صوبه وأبتلى به
ضرب الهوى قاسي كما ضرب نشاب
ما يمنعه قوة قلوب وصلابه
وإلا مطوّع خط لك حرز وحجاب
يا ليت ينفع بو محمد حجابه
إن كان سيد الغيد تلعات لرقاب
باني فوسط الجوف عمد وطنابه
وش بايفيد الدمع لو حن مرزاب
دايم على الرجال تزهى المهابه
ذيبن عوى مكلوم من راس مرقاب
يسري صداه وجاوبته الذيابه
وري المواقد واترك الجمر شباب
وأدفن جروحك بالصبر والذرابه