يا اصحابي تعالوا شوي
ابي احكي وش اللي صار
وابي اشرح معاناتي
وش اللي باقي احيا به
مراكبكم على المرسى
رغم ان البحر غدار
وانا ساحلكم اشقاني
قفل في وجهي ابوابه
حمدت الله من صغري
وكل اللي يجي اقدار
ولا اكفر بشرع الله
وديني مرخي اجنابه
اذا ودك تعرف الوضع
وتعرف وش هي الاخبار
قوافلنا على الراحة
تسير وتنبح كلابه
اعيش اليوم ع الذكرى
وبكرة عايش بتذكار
يمد العمر بي اكثر
وحظي يزرع اطنابه
يغطيني دعاء امي
ولا اخشى ابد امطار
واخاف الوسم لا اقبل
نقول الخير وش جابه
انا بنصحك يا حظي
تلازم سنة الاذكار
وتحفظ نفسك بنفسك
حظوظي ظني منصابه
انا حسبه حظيظ القوم
ومحسوبٍ على الشطار
ولا يدرون عن حظي
تعثر واعرف اسبابه
حياتي بختصرها اليوم
واسمع رحلة الاعمار
وافهم درس علمني
على كثر الذي صابه
بداياتي انا لاشيء
ترا كل البدايه صغار
وكنت احاول استرعي
بعض فكرة واعجابه
احاول اوصل بنفسي
تلامس يديّ الاقمار
واقول هناك شوفوني
بديني المس اهدابه
نسيت ان الثقه اصلا
حسْبتها ب تسع اعشار
وتذكرت ان الاصل انسان
بيرجع يوم لترابه
وعشان اعرف مكاني زين
ابعرف قيمة الاصفار
يسار الرقم لا قيمة
يمينه ترفع حسابه
انا ذاك الحزين اللي
دموعه رافضه تنهار
وانا ذاك السعيد اللي
يغص بفقد احبابه
وانا وضعي مثل اعمى
تجيه من الهدايا كثار
تكشّف له هداياهم
صور تجمعه بأصحابه