يا شعب مصر مره افهمنى
أنت الوحيد اللى هاممنى
اللى أنت فيه دا بيئلمنى
ويا شعب إغضب لو مره
كلامى دايما ف الممنوع
ف أسباب شقانا وأسباب الجوع
بخش دايما ف الموضوع
بس افهمونى ولو نظره
بنحب ليلى بطريقتها
هواها شعبى وهويتها
لولا يا خلق محبتها
لسيبها وامشى من بكره
بلفت نظركو يا مصريين
يا أهل بلدى يا منسيين
كان نفسى تبقوا بنى آدمين
وتعيشوا صح ولو مره
اصل البعيد اللى نهبكو
ومسلطينو على رقابكو
ومسلطنينو ف عذابكو
مش فارقه وياه الآخره
ياللى محكوم من روسيا
وبعت نيلنا لأديسيا
ومعاك أمركا وأوراسيا
ياللى انت على أهلك جمره
نفسى تموت كالقذافى
وتنقتل عطشان حافى
وتنقبر زى أسلافى
ونكسر وراك مليون جره
إنت البعيد اللى قتلها
والشؤم اللى ف موالها
يا ويلنا منك ويا ويلها
إن لم نقوم تانى بثوره