أنا وهيه ف كتاب واحد
وكانت بتلبس
إيشارب منقوش
بلون الطاقية
وتعدي ضافرا الضفاير
بفيونكة لون الزراير
حاوطتني من كل ناحية
أسرتني
قفلت عليّا
أمسك تسيب
أصغر تشيب
أقرب تغيب
أنده
تجاوب من بعيد
مقدرش أعود!!
يا مّ الشعور
شعرك طرف عين القمر
شالك
ما عدش يدلني لسكة هوا
أرجوكي لما نكون سوا
ما تصحّينيش
ما تحركيش
قلب القضا
ف صدر القدر
سيبي الدموع متحجرة ف عيني اليمين
متفجرة ف عيني الشمال
خايف أدمع
أنزفك
يا أبهج الأحزان
كان اللي كان
يا مفرقة الأزمان
في الفصل في السكة
دايماً
إسمي جار إسمك
خلاص
ماعدش التناغم
في الكلام والشكل
قَسِّمْتِي نفسك
ما عدّتيش تعملي حسابي
داريتي عين البراءة بنضارات سودة
كبرتي
قصرتي شعرك
حليتي مسخ الهزار
مصلوب في شجرة سنينك
بحث عن إسمك
عيني ف قديمك بتحلم
والجديد ذكرى
طول عمري
عايش معاكي
وبيكي وف دمي
لا كنتي
من أهلي ولا كنتي
أختي ولا أمي
إنسي النهاية اللي صارت
هاتي م الآخر
البسملة في النار طرية
وكلمتك سندال
إنسي الخصام اللي صار
عاودينبي للأول
في السكة نطلع حبايب
لبيوتنا نرجع خوات
حبك ما كنش بصور
ولا بينا كان جوابات
ياللا
ياللا انفضيني م الحنين
واستقبليني
بحب كان ميّت وجاي!!