أول ما سبتك سبيتنا
وانا اللي عشمي تثبتنا
من يوم ما طيفك ساب بيتنا
مسِخ الخيال
ما انت الخيال وانت خيالنا
ولا كانش لازم تخيلنا
قفلت أبواب مداخلنا
وبقى حالنا حال
وحالنا يصعب ع الكافر
يا حبيبي مين قال لك سافر؟
طب دا انت صابع وانا ضافر
يا ابن الحلال
تعالى حلل في حلالك
مين غيري أحلا بيحلالك
ما تقوللي مين غير حالك
دنا صبري طال
طال صبري زاد عن عمنوّل
وانت اللي غلطان في الأول
وانا حبي عمره ما يتحول
راخيه الحبال
وحبالي راخيه من الطرفين
عن عيني غبت يا هلترى فين؟
دنا وانت طول عمرنا حرفين
واو جنب دال