كل يوم يمر نكبر

كلّ يوم يمرّ نكبر..

كلّ يوم أحلامنا تصغر وتصغر..

خايف أصحى يوم وألقى العمر فات..

خايف إنّ الذكريات..

وحدها العمر الجميل..

وإن هذا الباقي ما بقى به باقي..

كلّ ما أتفقدّ مكان ألقاه خالي..

وأتذكّر..

كانت الأيام أجمل

كانت الأحلام أكمل

لو بيدّي..

كان أوقّف عقرب الدنيا وأظلّ هناك باقي..

واللي باقي ما أبيه..

لو بيدّي..

لكن أدري ما بيدّي شيّ..

وأدري إنّ الوقت يمشي..

وإنّي أفقد كل يوم أرواح أكثر..

وأنّي أكبر..

وأنّ كل أحلامي بتصغر وتصغر..

وأنّي بصحى وألقى كلّ العمر فات..

وألقى بسّ الذكريات..

حاضره والكلّ فات..

كان باقي فيك حلمٍ ما وصلته لا يردّك شي عنّه..

لا يفوتك..

ذوق به طعم الحياة..

بكرة أجمل ما بيبقى الذكريات..

بكرة أجمل ما بيبقى الذكريات..

وهذا الشارع الخالي يذكرّني..

وهذا الكرسي المهجور..

وهذا الليل..

وحبّات الرمل تذكر..

وإذا مرّيت في نفس الطريق اللي خذاك ولا بعد جابك..

تذكّرني مثل ما أتذكرك أجمل..

أنا قد قلت لك مرّة إذا تذكر..

محد يعرف قدر من حبّ لين يغيب..

وكنت بنظرتك ساهي..

بعيد هناك

وأنا وحدي مع روحي

ورجعت أمشي مع جروحي

رجعت أستدعي أجمل ما بقى بالذاكرة منّك..

وكان الشارع الخالي صخب أرواح

منو باقي ومن هو راح

هي الدنيا كذا تدفع ثمن ضحكة عيونك دمع

نسيت الجاي قلت أفرح

وجاني الجاي

وكل ضحكة معك بدفع ثمنها جرح

مافيه أفراح بالمجّان

وهذا الجاي وهذا الناي

وهذ الشارع الجمهور

وهذا الشاعر المهجور

وهذا البعد

محد يعرف ثمن من حبّ لين يغيب

فمان الله والدنيا وسيعة والطريق يطول

تبي تصدف كثير أحباب

وتضحك قدّ ما تقدر

وتتذكّر

محد تهتزّ له روحك مثل من غاب

محد يعرف قدر من حبّ لين يغيب

تذكّرني..

تذكّرني..

فمان الله.