وادى مصر طالعه فى يوم عيدها
وفى مواعيدها
بتغنى ويغنى وليدها
غنوة شجعان
مسلم مسيحى يقول مصرى
ثورة نصرى
مسجد كنيسه على الناصيه
وجرس واذان
وجه يناير بالثوره
سلم محاوره
وشورى مشاورة
ثورة شبان
القوه فيهم والوحده
الشعب والجيش ايد واحده
والسلم فيها يعليها
فوق البلدان
قلناها ثورة سلميه
مش همجيه
يرحل زعيم الحراميه
ومالهش مكان
قلناها كلمه وحميناها
خضناها ثوره وعشناها
من غير مناوره رسمناها
من قلب ميدان
تلاتين سنه يخرب بيته
الشعب كان دايما زيته
عضمه ولحمه وحريته
تحت القضبان
تلاتين سنه يدمر فيها
ويزل ناسها يوطيها
ياكل فى قوتها ويرميها
ف نار الغليان
تلاتين سنه كاتم صوتنا
واكل قوتنا
والعار كاسينا مخلينا
جثة همدان
عمل له شلة حراميه
وحزب فاسد شلليه
م المليارات الدولاريه
عبى المصران
ف بنوك سويسرا وبلجيكا
وف اميركا
سافرت فلوسنا وماتجيكا
يامصرى ياغلبان
تلاتين سنه اهم سماتها
تزوير وبلطجه فى حاراتها
ولا حد يسمع لصواتها
والكل مهان
تلاتين سنه الشرطه تدمر
تخرب وتضرب ماتعمر
لضلوعنا ع النار بتقمر
جوه الزنزان
وكان حاميها حراميها
وواخدها بايدها موديها
بين فتنه وهلاك يرميها
بين اعتى نيران
وخطت الثوره خطاها
سبحانه ربك علاها
والمولى سبحانه حماها
ويحيا الانسان
ترجع لمصرنا كرامتها
وامنها مع وحدتها
وتعود اليها عروبتها
بالمجد تتعدل اوزان
العدل هايكون نبراسها
والوحده هاتكون فوق راسها
حب الوطن هوه اساسها
اما الفساد مالهش مكان