أنا من أنا

أنا من أنا

سفن مدارات التوحد

فى بحار الأمنيات..

ونبى بيعشق الحوريات المستحية

من البحر للشوف..

أنا وردة طالعة من بساتين الأماكن

للندى وللطير

ولعصر بيحاكى الصفا..

وللمواويل..

وأنا واد صعيدى

كل ما ف أيدى الكرامة

والبسالة طوعها

والنزاهة

سترة العايق فى بلاد الارتحال

والريف..

فى انتحارات القيم..

من جدولين وربيع..

من أغنيات الحصاد البكر..

من فجر ضحكة الأطفال..

من حليب الصفو..

من عندليب المهج..

من البكارة..

والطهارة

والاندهاش بالضى

طالع للمدن تعاويز

وللقرى أناشيد

ولليالى الاحتمال بالشوف..

الاحتما من الخوف..

وللغرابه والطيابة

ونداهات السكك

وعرافات البلاد

أنا نبتتين من عين..

أنا عشق تين ورزين..

أنا فتحتين

على الشوارع الضيقة ف الصيف

.. أنا طاقة الفقرا ف غرابه الإحساس..

من افقر افقر ناس..

وأنبلهم.

السحر داكن فى العيون..

العشق ساكن فى القلوب..

الطيبة تسبح ف البدن فتنز بالريحان..

عدنان وفارس بس ما لى فهارس..

فوضوى التفكير فى كراريس المناهج..

عبقوى التنشين لكل من يسقط فى ساحتى

بنظرتين تركيز..

اسألني عنى يا نيل

واكتب فى أمواجك

فتى من شهد..

واكتبنى منى يالليل

واقرانى ورد فى حضره الهايمين..

وأنا جيت عشان اغسل وشوشك..

أو ارتمى ف النار وأحوشك..

أو اخلعك توب مش مناسب..

تلقانى راسب.. بس واد لميح..

كل المكاسب عندى.. مش توضيح..

خلعتك الناب المسوس..

وندهت مريدين الطريق.

اعلنت عن حضره..

فالكل هام..

قام الحطام اصطلا..

خدتك جلالة دوامات بحر الهلع..

رقصت خدود الشط

على طبل الوجع..

لو ترفضى.. رفضك مباح..

لو تنهضى يموت النباح..

قومى ابحثى.. أو فتشى..

عن فردة الخلخال..

يمكن نلاقيلك حلق..

ونبرعم الموال..

احنا الخلاص م العارضين الخزى

ع الرصفات..

م الصابغين وجهك رماد..

عارفك وشاربك شاى تقيل

فى الخدمة وأنا سهران على فروعك..

بقرى وبحفظ كل يوم أجزاء..

على طرف موجوعك..

موتنى جوعك بس طالع ع المطر والحلم..

أنا علم داكن من بطون السلم..

أو فيلم ابيض من سواد الظلم..

كنتينى يوم ابدا ماكنتك..

شابعانى عوم فى بحار جلالتك..

والموج عفى وخالع عبايتك..

حبانى كيف؟؟

وانتى الغشاوة فى الشتا والصيف..

كاتمة على وشك..

شايفانى طيف..

طب ليه كلاب الحى مانعينك..

ليه الظلام خيم على جبينك..

حرافيش حارات الانس

دايما محاوطينك..

يا تطلعينى منك..

يا تغيرى دينك..

يا تطلقينى عرفك

ما قادرش تخمينك..

وان كنت عاشقه العهر..

أنا خارج الخدمة..

وإن كنتى ناوية الطهر

لانشد ف دواوينك..

واطلع ميادينك..

وأقول لكل العاشقين عن بعد

..اهى.. بنت الذين..

عادينا الكل علشانها..

جاتنا بأحضانها..

واحنا اللى شايلينها

من صغر أوحالها

على كتف صامد ما همد..

أهلا بمن صانها..

وباح بالدم علشانها..

ومرحبتين..

يا بنت سندسنا النبيتى

ف كبايات السحر..

أهلين يا بكره المش مراود العشق

من دمى.. من نبت شرايينى بيتوضا..

ويصلى ف محراب الهوى والشوق..