شعار دنياي الصبر وشعارها الدنيا كفاح
لا قلت يوم وتستوي مرت سنين وما استون
والله اني مقتنع باللي يصيب من الرماح
اصغر رماحك صابني يوم اكبر رماحك طعن
وفوق هذا ما سلمت أنا اسمح ولا ألقى سماح
كل يمن بجيته حتى الدمع لا جاء يمن
أبوس راسك يا زمن ما عاد فيني للجراح
خلاص يكفيني أسى أبوس راسك يا زمن
يا مكثر ذنوبك معي ما كل ذنب لك يباح
لا من زعلت وش تستفيد وش مكسبك من ذا الحزن
استسلمي يا عزتي لا صارت أيامي سلاح
كان نفسي أسعدك بس الليالي طولن
حاولت أنا أشعل شمعتي بس المصيبة في الرياح
لاهي باللي نورن ولاهي باللي انطفن
اخترت في الدنيا ثلاث الستر وأنصاف وصلاح
وكرهت في الدنيا ثلاث لا ولا يمكن ولن
وحبيت في الدنيا ثلاث الفن وأمي والصباح
وحلفت لا ما اخون الثلاث انتي وجاري والوطن