يا مْحمد ابوصيك..؛ يا مْحمد ترى الدنيا دروس
مرَّهْ تجي لك مقبلهْ وأحيان تقفي مدبرهْ
نصيحتي لك والنصايحْ ما تثمّّنْها الفلوس
كثرةْ همومَ القلب لا زادتْ عليه تدمّرهْ
تصادُم الأفكار في عقل الفتي حربٍ ضروس
يمسي ويصبحْ كنّ قلبهْ فوق نار المجْمَرة
حافظ على دينك هوَ المنجاة في اليوم العبوس
صلّ الصلاةِ بْوقتها حتى تنال المغفرة
احفظ لسانك وانتبه للنفس من بعض الهجوس
بعض العلوم تْحُطّ من شان الرجل وتحقِّرهْ
واحفظ غلا إخوانك ترى أخوانك لك أسيوف وتروس
وخلّك مُوالي لابْن عمّك ل اعتزى بك تنصرهْ
واحفظ كرامةْ قلبك الطيِّب عن اضعاف النفوس
الحُرّ من طبعهْ طريق أهل الردا ما يعبُرهْ
اللي يعزّك يشتريك وما تغيرْهَ الطقوس
خلّك معهْ وافي ومن قدّرْ جنابك قَدِّرهْ
اللي تسُرَّك وقْفتهْ لا صارت أيامك نُحوس
إذا نصيتهْ شرّفك وان شاف عيبك يسترهْ
وخلّ طيبك مثْلما قالو عسلْ في حَدّ موس
اللي يجي لك بالغثا تقطع غثاهْ وتبترهْ
واحذر من اللي لا مشى يختال في مشيةْ عروس
بعض البشرْ ما ودّك إلا في ثيابهْ تقبرهْ
واتجنّب أصحاب الرّدا لا تصحب الغِرَّ الغَلوس
ما نَخْبُر إنّ الصقْر قالو انّهْ مخاوي قُبّرَهْ
اللي يجي يا مرحبا لا طاب له عندك جلوس
واللي مقَفّي لا تمسّكْ في غلاه وتجبرهْ
الناس لو صنّفْتَهم تلقاهم أشبهْ بالغروس
ذي غرسةٍ جَرْدا وذي شوكهْ وهذي مثمرهْ
والبُرّ لا منّك بذرتهْ في الرمال وفي الطُّعوس
بالطبْع ما تجني حصادهْ من رمالٍ مقفرهْ
وإذا بذرتهْ ف ارض خصبهْ. ينبت الحَبّ اليبوس
سنابلٍ من طيبها تنتج غلال امزبّره
هذي وصاتي يا محمد وانت راس ونسل روس
أبيك تحفظها ولك فيها دروس وتذكره