لو أبنظر في عيونك شفت نظرة إرتياب
شك وناقض في وجوده كل معنى لليقين
مدري خوفٍ لو أبرحل تزيد أيام الغياب
ولا من شدّة ظروفي تشكي فيني بكل حين
ولا شوقٍ وإشتياق لماضي أيام العتاب
ولا فرح وما قدرتي توصفينه بكلمتين
صرت أخاف بأي لحظه تقولي أطوي هالكتاب
وأطوي صفحات المحبّه اللي توارت من سنين
يا نهايات المحبّه ويا بدايات العذاب
يا مسلسل ما قدر يحمل بجوفه قصّتين
قصّةٍ قلبي إبتداها لما بادلك الإعجاب
وقصّة قلبك بداها لما زودّتي الحنين
أزعلي مني إذا إنك راضي لقلبي العذاب
وأتركي عاشق متيّم يكتوي من جمرتين
جمرةٍ بحشاي شبّت من تزاعلنا وذاب
منها قلبي المعّذّب لين أصبح يستعين
بالرجا اللي كل جرحٍ لو بترفق بيّه طاب
والغلا اللي كل همّ منه أقسم ما يبين
وجمرةٍ فوقٍ تعلّت فوق هامات السحاب
ومنها أصبحت طينٍ مثلما تسويّت طين
يا تعب لا يا عذابي من زعل أغلى الأحباب
والله إني ماني قاوي على زعلها لحظتين
ليتها ترضى عليّه وتريح هالقلب المصاب
ولا تطعن روح قلبي في ظَهَرْهَا طعنتين