مهما يكون الشعور اللي علي بادي
لا زلت أنا الوارد اللي ما طوى حبله
على القراح الزلالي طال تردادي
اشرب واصدر ظما مدري وش اشرب له
يا من تغاربتي غيابي وهو عادي
بُعد الرجل عن دواعي ذله اهيب له
ما امشي قبل لأعرف الوجهة بلا قادي
ولا صلي إلا وأنا متقبل القبلة
منزالي النايفه عن حدري الوادي
ورجل(ن) يجي في مسيل السيل يا هبله
أبعدت مالي غرض في ذل مقعادي
ما دام يلعب لي الذعذاع والعب له
ماني لعرفي مع اهل العرف مترادي
لا شك كبدي من اللي شفت مندبله
يا لاقية خير هاك العلم للغادي
اللي عجز يفرق الشيحه من الربله
أمانتك بلغيه لكل حسادي
لا غارت الكدش وكحيلان باصطبله
أنا أول العشر ماني للعشر حادي
مالك ومال افتراض الجاهل الأبله
يموت انا حاسدي ما ياصل ابعادي
منّي نجوم السما لو يفهم اقرب له
ولابد ما الهايج المايج يجي هادي
وكل(ن) يشوف المكان اللي يناسب له
إن مت مات النبي وآباي وأجدادي
وما دام لي يوم ماني ميّت(ن) قبله