الزعل طّول وكملنا شهر
والوصل باهت وجيت استنكره
هو صحيح إن الزعل وجهة نظر؟
تنتظر عذراً يجي ويبرره
والسؤال اللي على بالي خطر
كنت متردد ولكن بذكره
الزعل هو جرح؟ هو يترك أثر؟
أو عتب جامح بدون نفسره
العطش واضح على ذاك الثمر
والغصن مايل يحزّن منظرة
والسنابل روح، تستسقي المطر
تدمع الغيمة بدمع ما أطهره
والذرة موجوع ما بين الصخر
الرحى تطحنه وش ذنب الذرة
والعذر خبزا نقاوم به فقر
جوع متعري عسانا نستره
الوفاء ساكت يعاني من قهر
مختنق مبحوح وسط الحنجرة
وانتصار النفس لو بان وجهر
نقمعه داخل نطاق السيطرة
والزعل لو زاد قدمنا مهر
والعفو مطلوب عند المقدرة
ولو عتابك من محبه قد ظهر
لا تعيش الدور كنك عنتره
العتب ينبوع واطهر من نهر
وشوقي الضميان يرشف كوثره
لا تلوم النفس وتلوم الدهر
ولا تزيد البُعد بُعد وبعثره
يكفي أني فاقدك مدة شهر
وفاقدك مخطي ويرجو المغفرة
لا شعرت بذنب دور عن أجر
ومن يحبك لا تفكر تخسره