لعن ابو جده نيوتن...لعن ابو جد اكتشافه
والله ان عيونك انتي فيها سرّ الجاذبيّه
كل مخلوقٍ عرفته يكره الموت ويخافه
بس انا مابي حياتي دام ما حنّا سويّه
الخطا قلبي تولّع فيك وامضيتي اعترافه
يوم شافك طاح كلّه واحترق روحه وجيّه
والله اني اموت واحيا ما تعمّدت اللقافه
ولا ادري حتى هذي دعوه والا مكتوبٍ عليّه
صرت اهوجس لاطرى لي سيرة الحب وخلافه
من كثر حبي لحبي قلت مابالأرض زيّه
والله ان الحب كله ذوق واسلوب وثقافه
من زمن عنتر وعبله لين مجنون الحويّه
هذا مجنون ويوقّع في الهوى عقد احترافه
وهذا مايملا عيونه غير هذيك البنيّه
ليه نكره في السوالف سيرة الحب ونخافه
ليه نتلعثم مدام الحب كلّه واقعيّه
ليه نستنكر ونطعن في عناوين الصحافه
لاغدى المحبوب قاتل بينما العاشق ضحيّه
ايه انا حبيت وحده وهدمت قلبي حسافه
رغم كل اللي حصل لي لاتزال تموت فيّه
وش نيوتن مانيوتن لعنبو جد اكتشافه
والله ان عيون هذي فيها سرّ الجاذبيّه