يا العاقل اصبر للزلل ما دام جاريت السفيه
حيث السفيه إن جيت تبغي ترفعه يرجع ورى
وإذا تسيفه طنشه ولو يشوش الرأس فيه
ردك يعليّ هامته ويبينه بين الورى
والجاهل إذا من تشره ما حدن يشره عليه
ما قد خبرنا عاقل في شرهة الجاهل زرى
تراه لو يرمي حجاره رميه يكسر يديه
والله سبحانه فرق بين الثريا والثرى
والذيب ما هاب الكلاب وكل ريع يعتليه
الذيب يعرف كيف يصطاد الحصاني والجرى
والصيرفي يعرف مدى فرق الريال من الجنيه
من دون ما يرجع يقلب في سجل ودفترا
ومجادلك بالحكمة العراف بيضان الوجيه
تكسب معارف من معارفهم وهم فخر وذرى
خاو الذي بالدين والحكمة وله رأي نزيه
أخوة الطيب تزيدك ريح مسك وعنبرا
والمجلس الّلي يسمعك نمّه وغيبه لا تجيه
لو كان فيه البن الأشقر في دلاله ينثرا
لا أكبر الله مجلس الغيبة ولا من ينتحيه
ولا بارك الله ناقلين الهرج كذب وافترا
هذي نصيحه عابره يفطن لها العقل النبيه
وكان النصايح بالذهب عند العوارف تشترى
وصلوا على خير البشر صلى الله وسلم عليه
الّلي بعثه الله وحل بطيبه وأم القرى