اهب يا شاشة بريموته بيدي غيره

اهب يا شاشة بريموته بيديّ غيره

للشمال يوجّهونك واليمن والشّامي

مثل ما قال المثل: من جرفٍ لدحديره

ويش تفرق به عن اللي يعبد الأصنامي

إن قالوا: قوم قم واصبر على التصبيرة

واجمد اجمد لين يصدر لك قرار سامي

ابتسم كشر لا ترمش لا تجيك الحيرة

لا تثاوب خل شوفك دائمًا قدّامي

ابن منذر كان من آخر ملوك الحيرة

لا دخل دين المسيح ولا دخل لِإسلامي

يمكن إن نفسك تبي مندي على قصديرة

ما أنت لاقي بس لا تكثر من الأوهامي

شعرك اللي له سنة وتخمّره تخميرة

ما أنت ابن قضعان ذاك ولا أنت ابن وسامي

وأكثر الأصحاب ليت الشر يكفي خيره

والبعض لا والله إلا معصمٍ وحزامي

لا تقول بيت القصيد أمرّره تمريرة

مثل غبّة بحر ما كلٍ لها عوامي

وانتبه ثم انتبه للخط به تدويرة

قبل تكشّخ في شماغ العقل والبسامي

وان وقعت احذر تدور لك على تبريرة

انقل الموتر على نقلية البسامي

ومستواك احرص دوام العمر في تطويره

وشوف من عاشوا بمصر وشادوا الأهرامي

لا تظل مثل من رايه حجب تفكيره

وان عجزت الفهم شوف مفسّر الأحلامي