دْبَيْ نالَتْ كِلّ مَقْصُودْ
واتْبَخْتِرَتْ فِيْ اعْلى الميادينْ
مِنْ فَضْلْ رَبٍّ جَلْ مَعْبود
ومْسَيِّسٍ عِلْم وبراهين
حامي حماها مَعْدَنْ اليُود
وهو قايد النَّهْضَهْ مِنْ سْنين
مثَّلْ مِشاريع ونِفَقْ زود
لاعْجابْ مِ اللّي فيه بادين
شَكْل النِّفَقْ ما صارْ مَوْجُود
مِنْ دِيرة «النّمسا» إلى «الصين»
مَصْنُوعْ بِدْع ومِشْرف يْرود
ومْهَنْدِسينه مِ «الفراعين»
تَحْت البَحَرْ باسط ومَمْدُود
أنْواع مِ الليتات بِسْنين
خِضْر وصِفِرْ فِيْ السيد عَنْقود
حِدّةْ سَناهِنْ تَغْشِي العين
سِيداتْ «رُونْ» تْحِفّ لِبْرُود
و«رادارْ» يَكْشِفْ بين بَرّين
والسِّفنْ فوقه يْمِرِّنْ حْشود
مِجْراهن العادي بْسَهْمين
كَمّ مَصْرِفَهْ ما شَيّ مَحْدود
بِمَّا ينوبَهْ مِسْتِعِدّين
قَصّ الشريط بيومٍ سْعود
وتْباشِروا كِلّ المودّين
اللّي حِضَرْ شيخان وِوْفود
وِجْمُوع مِنْ أقْصَى البلادين
لا زالْ مَشْكورٍ ومَحْمُود
فِيْ حِفْظْ مِنْ لَي لِهْ مْصَلّين
ياللّي رِفَعْ سَبْعٍ بلا عُمُود
يَحْميه عَنْ كيد المعادين
صلوا عِدَدْ ما رَنَّتْ وعود
عَ النبي والصَّحْب الموالين