سلامتك يا منبَع الود والذوق
سلامتك يا أجمل ورود الحديقه
يالله ما من بالسما معتلي فوق
يا عالم أسرار القدَر والخليقه
تجعل علينا شمسها دوم بشروق
ولا للمرض يبقى عليها طريقه
ما كنّه إلاّ جرح بالقلب مفتوق
لا قالت الريم أونَس القلب ضيقه
وبين الحنايا كنّه مدَرهَم النوق
خوفٍ سرى لين امتلاني زعيقه
حاولت أداري دمعتي داخل الموق
حتى بدت من فوق خدّي طليقه
برفوق جيتي وارحلي عاد برفوق
يا علّة اللي كل صعبٍ يعيقه
جادل غلاها يعْجز الوصف ويفوق
خطْرٍ هواها يشتعل بي حريقه
روفي بحالي عاد يا خير منطوق
ملّيت أراقب ساعتي والدقيقه
ويالله بلاش أبقى من الدمع مخنوق
يا حلمي اللي صرت اعيشك حقيقه
هاتي يدينك يرْتسم زاهي الذوق
يالفاتنه يالشامخه يالأنيقه
وفكّي وثاق مجدّلك ضامه الطوق
خليه يلعب والنسايم رقيقه